人物專訪｜引入企業級開源破舊立新　文志鋒堅守己道

破舊立新，從來非易事。文志鋒（Peter Man）20 多年來，由將開源（Open Source）帶進香港，改變過往以閉源軟件為主的市場；到採用以人為本的管理文化，建立穩定的工作團隊，一點一滴為 IT 界開創新風氣。「Always do the right things」，Peter 不只將座右銘掛在口邊，更身體力行，將理想中的「Right things」化為現實。

開源情意結

在美國修讀 Computer Science，甫大學畢業，Peter 便受朋友所託，為一間電腦硬件分銷商於美國中部設立分公司，「一個人去到陌生嘅地方，完全冇人脈，由零開始去幫人 Set up 個生意」，成為影響他最深遠的寶貴經歷。親身體驗 IT 技術與商業的結合，令 Peter 決定放棄技術型工作，將事業重心轉向業務拓展及銷售，並回流香港發展。

以銷售作為發展事業的起點，但 Peter 直言不想銷售一式一樣產品，亦不想單單追求生意目標，反而希望能擔當好的說客，推廣好的概念。他以汽車舉例：「唔想只係賣唔同牌子嘅車咁簡單，而係賣電動車呢個概念。」2003 年，其時他所屬的公司 Novell 收購 SUSE，成為他初次接觸「開源」這個好概念的契機，正正與 Peter 的理念不謀而合。

當時絕大部分企業仍未認識開源軟件，Peter 憶述：「客戶會擔心係咪安全，或者問係咪唔洗錢？唔敢喺主要系統試」。於是，他便開始在香港推動企業級開源，又撰文推廣相關概念，成為行業先驅。

由僅數人的團隊開始，眾志成城，逐步取得政府和銀行等大型機構的信任。Peter 稱企業系統的遷移歷程或長達 5 至 10 年，但「睇到一個個客戶都俾我哋說服咗，開始越嚟越多人用，好有成就感」。

長情管理層

對於 IT 界客戶而言，最怕供應商經常換人，Peter 認為要全面照顧客戶，建立牢固的客戶關係，團隊的穩定性最為重要，他亦以身作則，在 Novell 工作了11年，擔任 Red Hat 香港掌舵人亦已長達 13 年。「我覺得每一份工作、時期，都有唔同嘅嘢要 Shape 出嚟」，不要成為大機器當中其中一個齒輪，應該不斷爭取將工作進化， Peter 認為只要彰顯自身價值，薪金及職位自然水漲船高，毋須刻意轉工。

事實上，並非只有 Peter 這位掌舵人長情，連帶一眾核心團隊，包括經理級或技術人員同事，已共事超過 10 年，他坦言對此引以自豪。

管理之道在於人

好老細難求，尤其做生意難免要講錢，香港「捽數」文化根深柢固，在 IT 界更是司空見慣，Peter 對此甚為反對：「數唔係捽出嚟，管理層應該係要教，而唔係不斷鬧。」

剛經歷愛犬因病離世的切膚之痛，Peter 以養狗作例子，「隻狗仔會唔會去廁所、亂咬傢俬，主人要用好多耐性去教，就好似請個新員工返嚟，你唔可以預期佢一下子就自己識得做所有嘢」。

他續說：「隻狗仔可能會病，要你照顧佢，有啲壞嘅主人可能會對佢冇咁好，甚至棄養，其實就同對待員工一樣，員工冇可能 10 年都不停爆數，我覺得咁樣就唔要個員工係好唔啱。」

作為上司，Peter 認為絕不能人身攻擊員工，或流於發洩情緒，「呢件事係會影響到員工嘅 Life 同 Family，唔係淨係影響一個人，咁樣嘅管理方法係冇意義」。

透過文字分享價值觀

除了以身作則，喜愛蔡瀾的他更在 LinkedIn 以文字分享過往工作經歷、日常生活，道出自己的價值觀，批判不公義的事，「有人都有問過我怕唔怕得罪人，但我覺得我有責任去指出唔啱嘅嘢」，甚至更有「讀者」私下感謝 Peter 為他們發聲。

Peter 強調非常期望能改變這種惡劣工作文化，為共事多年的員工繼續維持一個穩定、積極、健康的工作環境，「大家用開心嘅態度，或者 win-win 嘅方法，都一樣可以做到成績」。

至今，開源已成為不少企業及政府的首選，無論是企業版或社區版，都已在香港開花結果，Red Hat 客戶更遍布各大企業。Peter 笑言期望退休後可自豪地說：「香港今時今日用咁多 Open Source，我都有份貢獻。」